Pajūrio naujienos
Help
2024 Vasaris
Pi 5121926
An 6132027
Tr 7142128
Ke18152229
Pe291623
Še3101724
Se4111825
Apklausa

Ar pasigendate spartesnės daugiabučių gyvenamųjų namų renovacijos Kretingos rajone?

Taip
Ne
Neturiu nuomonės
Komentarų topas

Kastėni rek sosoktė, pakol bolvė ėšvėrs

  • Audronė PUIŠIENĖ
  • Būkem žemaitē
  • 2014-05-20

Kretėnguo gyvenonti, bet kėlėma nu Salontu, Butkevičienė Ona saka, ka jaunas gaspadėnės visa nenuor muokytėis sokti kastėni, katras nu sena bova miegstama žemaitiu patruova ė per švėntės, ė per kasdėinius darbus.

Gaspadėnė Butkevičienė Ona saka, ka sosokte gera kastėni rek ė gera ūpa.

„Bova laiks, ka kastėnis nesėskaitė bronge pagamėnams, o ka nuoriedavos ku nuors įduomesnė ė skanesnė, ta būdava, ė soksem kastėni“, - Butkevičienė Ona pasakuojė, ka žmuonės visas laikas kastėni didele miega.

Soktė kastėni anou ėšmokėna jau daba i anapili išejusi mama Baltuonienė Ona. „Ka apsižanijau, ta ėr ėšmuokėna. Pėrmouji karta, atsėmenu, svėista ė somušiau. Paskiau ėš ontra - treti karta ė ėšejė. Tep ė soku ton kastėni per vėsa sava gyvenėma – ė nomus, ė vėsa pamėlėje. Doktie Nomeda yr ėšmuokusi kastėni darytė, bet kėta doktie ė mona jaunesnės prietelkas vės saka, ka laika netor. O ka monėm mama muokėna, ta sakydava: „Kastėni rek sosoktė, pakol bolvė išverd“. Tep ė yr ėš tėkra: bolvė verd, vo gaspadėnė kastėni sok. Je vėsku darysi, kap rek, ta kastėni tėkra ka per tou laika sosoksi“, - ruokavuos Ona ė paruodė, kap tas daruoma.

Ka sosoktu skanė kastėni, ana jem 180 g svėista – saka, ons doud gera skuoni, tumet dar 100 g margarina, vėina dėdėli ėndieli krautovėnės grietėnės – butėna 30 pruoc. rėiboma, ber droskas, kmynu, butėna – česnaka. Svėista gaspadėnė pakaitėn, bet atsarge – je perkaitinsi, kastėni nesosoksi. Sokont svėistą so margarino, ded po šaukšta grietėnės ė vės sok. Ka besokont tas kastėnis praded rasuot, tumet viel pašėlda. Ė tep – pakol soded vėsa grietėnė. Užtat rek kastėni sokont torietė kontrybės, katruos jaunuoms gaspadėniems ė pritrūkst.

„Ka gyvenuom pri mamas, ana kastėni sosokdava ė su rūgštu pėinu – tuoks tėkdava valgytė ė per puosnika. Bet mon laba tink so svėistu – juk ka edavau gaspadėnautė ė per budynės, ė per veselės, ė krikštynuos, visim didele tėkdava mona kastėnis“, - Ona sakies, ka musiet jau vėsa omžiu ė bus pradėrbusi pri pečiaus – yr dėrbusi grūdu gamykluo, Salontus, Palonguo ė kėtor. Daba – jau pėnsijuo, bet aten dėrbtė i vėina kavėnė Kretinguo. Tėi, katrėi žėna, aten čia pasiiestė kastėni, vo kap Ona sok kastėni, karta ruodė ė per Lietuvuos televizijė.

Butkevičienė Ona be kastėni da gamėn ė spėrgynė, ė cėbulynė – tas patruovas, katras žemaite didele miegst ė nier pamėršė.

***

ŽUODYNS

Abrakas – riekė

Buovytėis – užsiimti niekais

Dicinas – peilis gyvuliui pjauti

Jiekšis – kirvis

Korė – kalakutė

Parkamas – medinės tvoros virbas

Perenė – pirtis

Trėmolis – arbatinukas

Vadala – valkata

Žlagatyti – valgyti, ryti

Peldžių (Kretingos r.) k. žuodiu parinka Maksvytis Jozė, muokytuos ė poets

***

MŪSA KŪRIEJE

Notėkėms parogėinuo

Vėina vasarelės dėina

Ėš miestalė ėjau vėina.

Saulė šveitė, gera šėldė,

Mona šėrdėis nieks negėldė.

Tik beenont parogėinuo

Sostėkau aš Levi vėina.

Ons tik moni čiopt į kliebi

Ė pradiejė rėtinietė.

Ėš pradžios tik kataliouti,

No paskou jau ė bočioutė,

Negalio beatsėgauti,

Nier ni kap mon gvalta šauktė.

No tas Levis tuoks begiedis

Būtom gret jau nosidiejės,

Bet aš merga nuogne dėkta,

Nuors ė neso šep jau pėkta,

Bet jau toukart ožsiotau

Ė par spronda ožkėrtau.

Stuov jau Levis ėšsėžiuojės,

Saka mon: „Kū če vuožioujės,

Unt šiuo svieta nebie grieka

Nejimk to i galva nieka“.

„Ek to šalen, neviduonė!” -

Sosigruobusi sijuona

Nu tuo Levi biegau šalėn,

Lai ons en pas velnius pekluon!

JUCIENĖ Juzefa

Kretinga


Visos teisės saugomos. © 2006-2017 UAB 'Pajūrio naujienos'. Atsakomybės apribojimas. pingvinas